ما كتب عن مصر

قالوا مصر فى ازهى عصر
كل واحد فيها حر
يبدى رأية مهما كان الرأى مر
وأقتصادنا برضة حر
والحياه بقى لونها وردى كله حلو وشئ يسر
والحكومة من ولادنا كلهم عايزين بلدنا تبقى زى الغرب وأحسن
والجميع متأكدين
أن ثروة مصر فى أديهم امانة
وبأمانة يوزعوها عالصعيد والفلاحين
كلهم مش طمعانين فى المناصب والكراسى
أصلهم ناس مش محتاجين غير رضا الرحمن عليهم
والسبح خايلة فى اديهم كلهم من المؤمنين
أن كل الدنيا فانية والحياه بتزول فى ثانية
كله خالى من الذنوب والرئيس أعلن بذاتة الكفن من غير جيوب
والجرايد والاذاعة أبتدت بالخير تبشر كل وقت وكل ساعة
والنزاهه فى عهدهم وبهبالتى وبسذاجتى قمت انا صدقتهم
والتقيت لك عقل بالى قالى يلا يا شيخ أمين
قوم ووعى الفلاحين
واللى قاعدين عالكراسى ودن طرشة وودن طين
قوم ووضح للحكومه موطن الداء الدفين
انت شاعر يلا اكتب للحكومة عن هموم الفلاحين
الحكومة حتشكرنى تقول يا أمين
أدى المعارضة بصحيح لولا ها مش شايفين
افكار جديده وجوه العقل منسية
وتعالى خد تقديرية عالسبع دواوين
وفليلة سوده وكان فيها القمر هارب
تربست بابى وبابى اصلة كان دايب
من رفصة واحدة اتفتح والقى البوليس طابب
قام قال لى اسمك امين انا قلت ايوة يا بية
قام بص بصة لمخبر والسلاح فى ايدية
وقال له روح ركبة انا قلت له عشان اية
مسألش فية ولقيتة بص فى عنية
وفى لحظة شفت الكتب عالارض مرمية
صعبت عليا الكتب وانا اشوفها بعنيا
فيها الفنون والادب ملهاش اهمية
وتجارب الانسانية تحت رجليهم
ونتاج عقول مبدعين ليهم اساميهم
ولمحت عنوان كتاب مزعينة ب أديهم
كان للامام الغزالى فى رؤية فقهية
قلبى انقبض والدموع بانت على عنيا
وفكوا درف الدولاب بطريقة وحشية
ونكشوا كل اله صيفى وشتوية
قلبوا السرير عالكراسى ولملموا الاوراق
حتى الصور لملموها وفتشوا الادراج
ولم كل الورق ولا سابش قصقوصة
والشقة صبحت سويقة وزوجتى فى الحوسة
الدم منها نشف من خرعتى والقهر
وخد فلوس مش كتير مصاريفنا طول الشهر
وتلات تلاف مهر ابنى قصدى باقى المهر
يعنى الفلوس ست الاف والفاكس وشهادتين
تقدير لاحسن قصيدة شعر عامية
واخدها فى اسكندرية من سنة الفين
بقوله ايه تهمتى قالى انت مالأخوان
انا قلت قول غير كده ودى تهمة تستاهل
تاخد تاريخى وعمرىده انت مش جاهل
هوه انت مش مصرى زيى تبقى من الاخوان
مش الرسول قال لنا المسلمين اخوان
والمسلمين والنصارى فى مصر مش اخوان
قام قال لى بطل كلام
وفى جابر بن حيان لقيت لك خمسة قابلونى
جتت وروسهم كبيره بحقد بصولى
ونزلت من البوكس خدوا شالى وغمونى
وخدونى عالحجز من ايدى وسحبونى
فى الحجز متغمى برضة والكرامة مفيش
والناس بتصبح نمر يعنى الاسامى مفيش
وقالولى كل اللى قلتة كان هيافة وطيش
واسمى كام عندهم كان الرقم تمانين
وف كل ساعة الاقى خمسة ندهولى
تمانين تعالى وبره الحجز يخدونى
املى اسمى واسامىكل اولادى
يعنى الاناث والذكور وده كلة شئ عادى
وتاريخ ميلادهم وازواجهم وزوجاتهم
وعيال عيالى ومين عمى ومين خالى
وعيال عيال ابن عمى وابن خالتى كمان
وكمان جيرانالجيران وانطق بصوت عالى
ومين صحابى فى شبابى قبل مأبقى عريس
ومين وسمعتة شعرى فى قطر او اتوبيس
وجه حضر زفتى وعملها صحوبية
والزفة كت اسلامية ولا فية ترقيص
سؤالات تغيظ بعدها ينده يا صول سماعيل
خد اسمة اية رجعة امسك ايدين تمانين
تمانين تعالى وينده عسكرى م الحجز
تمانين معاك رجعة ويخش جوة الحجز
تمانين كمالة العدد والحجز مفيهوش عجز
تمانين تنام مسطرة تمانين دراعك ورا
تمانين بلاش كحكحة
وكل دة والغمة مربوطة على عيونى
انا قلت اية قصدهم عايزين ينسونى
اسمى ويوم مولدى ولا يضايقونى
قعدت سارحومش عارف نهار من ليل
واحناالنهاردة التلات والا احنا يوم الاتنين
ويومى فى السجن عدى زى ست سنين
وهوه يوم اللى شفتة هد منى الحيل
ورحلونى النيابة كان معايا اتنين
وكان وكيل النيابة ابن ناس ورزين
وقال لى اسمك يا شيخ انا قلت لة تمانين
قعد يكركع ومات من الضحك واتنطط
وقالى طب هات بطاقتك قلت فى الكراتين