قوم حضر العشاء لأبنك

دليلك الكامل لصحة الأطفال النفسية والعقلية



أخيراً هيجيلنا (بيبى) إن شاء الله، وهو حدث سعيد بلا شك... وبيقولوا كل بنت بتستنى اليوم ده وبتحلم بيه من وهى لسه فى اللفة، علشان – زى ما بيقولوا- البنت عندها بذور الأمومة منذ نعومة أظافرها، يعنى هى أم بالفطرة، تمارس الأمومة مع أخواتها أو مع أى حد معدى مش مهم، بينما الرجل لا يشعر بالأبوة إلا بعد أن يرى أبنائه بالفعل... يعنى الست – أو حتى البنت- عندها ميل فطرى للعطاء بدون مقابل، وده هو معنى الأمومة الحقيقى ببساطة..

أنا أول لما عرفت إنى حامل، والدكتورة قالت لى أحسن تريحى لك كام أسبوع واللا حتى كام شهر فى البيت وتاخدى أجازة طويلة من شغلك، الصراحة فرحت، قلت يا سلام، بعد سنين الدراسة الطويلة والشغل المرهق والسواقة والقرف، أخيراً هقدر اقعد كده مأنتخة فى البيت ومتستتة من غير شُغله ولا مشغله، لأ وايه، عندى مبرر لذلك، يعنى محدش له عندى حاجة، حامل وعايزة أريح و"أنام على ضهرى" زى ما بيقولوا فى الأفلام، طب ما الأمومة حلوة أهيه، أُمال عطاء أيه بأه، دى من أولها هنا ورحرحة.. يا رب.

مش قادرة أقولك أول أيام أجازة لياّ فى البيت كانت أزاى.. كانت أشبه بالمعجزة.. مش مصدقة نفسى. فعلاً فعلاً أنا فى أجازة... طبعاً مش هقدر أطبخ... هطلب سمك مشوى من المحل اللى جنب البيت.. شىء مريح جداً..... بس برضه اليوم طويل .... تضيعى وقتك إزاى يا حنان... إزاى يا بت يا حنان... أشوف نفسى بقى، الواحد عمره ما كان عنه وقت للتفكير والتأمل فى حياته اللى فاتت، بقالى سنين فى الشغل، وصحابى كلهم بيشتكوا منى اللى مش متجوزين بيقولوا إنى بعدت عنهم علشان أنا أتجوزت، وكل البنات اللى مش متجوزة بيفتكروا إن اللى بتتجوز بتخاف على جوزها يتخطف، أو بتخاف على نفسها من الحسد، علشان كدة بتبعد عن صاحباتها اللى لسه من غير جواز، يمكن فيه ناس فعلاً بتفكر كده... يمكن... بس بالنسبة ليا أنا ده كلام فارغ، الموضوع معايا مش كده خالص، بس الجواز والبيت فعلاً مسئولية كبيرة بتاخد كل الوقت، أنا نفسى أشوف صحابى وأخرج معاهم كتير زى زمان، بس ماكنش عندى وقت خالص، وبصراحة مش بس موضوع الوقت هو المشكلة، ممكن أكون أنا بقيت فعلاً أتعمد أبعد عنهم، لكن طبعاً بشكل غير واعى ولا شعورى وده علشان إحساسى أن أنا فى وادى وهما فى وادى تانى يعنى أنا بقى عندى أولويات تانية فى حياتى وبرضه فيه إنسان مرتبطة بيه، والارتباط شيء مهم للبنت، فيمكن كنت بحس إنها حاجة مش ظريفة إنهم يشوفونى كتير، وبالتالى يحسوا كل ما يشوفونى بالزعل على نفسهم، أنا عارفة أن ده تفكير متخلف لأن الجواز قسمة ونصيب، وعدم الجواز مش نهاية المطاف يعنى، بس برضه الناس كلها بتفكر كده... عشان كده كنت بفضل – أيضا بشكل لا شعوري- الاختلاط أكتر بصاحباتى المتزوجات، مش عشان حاجة، بس همومنا واحدة، ومشكلاتنا واحدة، يعنى أعمل مكالمة لفلانة صاحبتى المتجوزة أسألها عن طريقة عمل صنف أكل معين، أو أسألها أجيب شغالة منين، أو أستشيرها فى مشكلة عندى فى بيتى.. كدة يعنى، ولو أن الحكاية دى أيضاً لم تستمر، لأنه بالرغم من إننا كلنا ستات متجوزة، بس برضه كل واحدة حياتها وظروفها غير التانية، اللى مخلفة واللى لسه، اللى بتشتغل واللى لأ، اللى جوزها اجتماعى واللى جوزها مابيحبش صحابها.. المهم النتيجة أن الصداقة بعد الجواز مابقتش جامدة قوى زى الأول...
أنا لقيت القعدة فى البيت فرصة حلوة لاستعادة الذكريات والرغى زى زمان، بس قلت أعمل تليفوناتى بعد الضهر مش على الصبح كده، ما أنا عارفه كل واحدة عندها ظروفها ، وخصوصاً لأنها بتشتغل كل يوم من سبعة الصبح، المهم بعد صلاة العشاء كلمتها:
آلو يا إزيك.. مفاجأة.. عارفة أنا مين ؟
مش واخده بالى.. مش متأكدة.. إنتى مين ؟؟؟
أنا حنان يا بنتى مالك متعصبة كده ليه ؟
معلشى أنا صاحية من بدرى زى ما أنتى عارفة وعندى صداع... والله وحشتينى.
انتى أكتر.. أنا بكلمك متأخر واللا حاجة ؟؟
أيه؟؟ آه...لأ.. قصدى عادى الساعة لسه تسعة ونص، أنا مابانمش قبل عشرة .. عادى
أنتى إزيك وطنط وأونكل ؟
كويسين، أنتى الجواز كويس ؟
آه.... عندى أخبار .....
أنا مبسوطة قوى إنك كلمتينى أصل كل اللى بيتجوزوا بيختفوا.... أبقى كلمينى على طول، أنا هكلمك مرة من الشغل بقى ونحكى كل أخبارنا... خللى بالك من نفسك.... سلام ..
طب سلام...
إيه ده هو الناس بقت ليه مشغولة كدة قوى، محدش عنده وقت لحد، معلش أكلم هبة، ماهى متجوزة زى حالاتي:
آلو يا هبة... إزيك يا بنتى وإزاى " يوسف" و " عمر" ؟
كويسين.. طول النهار محمود سايبنا، وأنا بجرى فى البيت زى المجنونة، بكره هتتلخمى نفس اللخمة دى وهفرح فيكى ..
الله مش هما كبروا شويه، ايه لسه تعبانة معاهم كده ؟
" يوسف" عنده أربعة، آه أحسن شويه، مع أنه زى العفريت فى البيت، بس اللى تاعبنى قوى "عمر"،